பனிக்குள் தளிர்த்தல்..!!

தேடுதல்கள் நிறைந்திராத காலம் அது

விதந்தோதல்கள் அற்ற

உலகந்தான் எனதாயிருந்தது;

அதிகாலை அறை நிறைக்கும்

முகிழ்த்த மல்லிகையும்

கரு புலரிக்குள் சிவந்திருக்கும்

செவ்வரத்தையும்..

நினைவில் மீந்த

பூச்சியங்களிலிருந்து கடன் வாங்குகிறேன்

ஒன்றை; பின் இரண்டை;

மழை..

ஆம்.! நல்ல மழை;

வெண்ணிறச் சிறகுகளை அசைத்து

அதோ, மேலெழுகின்றன

என் கடல் மணலில்

குந்தியிருந்த பறவைகள்;

சிறகுகளைத் தீட்டும் வர்ணத்தை

வானவில்லும்

இளைப்பாறலுக்காய் தேடும் கிளையை

ஒரு மரமும்

அவ்வாறே எதிர்பார்க்கிறேன்..

பனிக்குள் தளிர்க்கப் போகும்

பதியம் வைத்த செவ்வரத்தையையும்..